அரிய 16ஆம் நூற்றாண்டு அதிசய நூல் லண்டன் ஏலத்துக்கு
பேரிடர்கள், விசித்திரமான வானிலை, உலக முடிவு குறித்த காட்சிகள் ஆகியவற்றை விவரிக்கும் 167 ஓவியங்களைக் கொண்ட 16ஆம் நூற்றாண்டின் நடுப்பகுதி ஜேர்மன் கையெழுத்து நூலான புக் ஒஃப் மிரக்கிள்ஸ் (Book of Miracles) ஏலத்துக்கு வருகிறது. அறியப்பட்ட ஒரேயொரு பிரதியான இதனை டிசம்பர் 10 லண்டன் (London) நூல்கள் மற்றும் கையெழுத்துப் பிரதிகள் ஏலத்தில் கிறிஸ்டீஸ் (Christie's) முன்னிலைப்படுத்தவுள்ளது.
£700,000 முதல் £1 மில்லியன் வரை மதிப்பிடப்பட்டுள்ளது. அறிஞர்கள் நூலை அறிந்த பின்னர் அருங்காட்சியகங்கள் உள்ளிட்ட பொது நிறுவனங்களுக்கு முதல்முறையாக ஏலத்தில் பங்கேற்க வாய்ப்புக் கிடைக்கிறது. ஏலத்துக்கு முன்னர் ஆறு நாட்கள் பொதுமக்களும் அதனை நேரில் பார்க்க முடியும்.
1550களில் ஒக்ஸ்பர்க்கில் (Augsburg) உருவாக்கப்பட்ட நூல், தெற்கு ஜேர்மனியின் (Germany) கோட்டை நூலகத்தில் கண்டறியப்படும் வரை ஏறத்தாழ ஐந்து நூற்றாண்டுகள் அறிஞர்களுக்குத் தெரியாமல் இருந்தது. 2008 ஏலத்தில் £100,000க்கும் சற்று அதிகமாக விற்பனையான பின்னர் அமெரிக்கக் கலைச் சேகரிப்பாளர் மிக்கி கார்ட்டினின் (Mickey Cartin) சேகரிப்பில் சேர்ந்தது. 2013இல் வெளியான நகற்பதிப்பு அதற்குப் பரந்த கவனத்தை ஈர்த்தது.
நீர்வண்ணம் மற்றும் குவாஷ் (gouache) ஓவியங்களில் 1230 ஃபிரீசியா (Frisia) வெள்ளம், 1456 ரோமின் (Rome) சிவப்பு மழை, 1527 போலந்தின் (Poland) வெட்டுக்கிளிக் கூட்டம், 1551 லைப்சிக்கில் (Leipzig) ஐந்து சூரியன்கள் போன்ற தோற்றம் என்பன உள்ளன. நிகழ்வு இடம்பெற்றதாகக் கூறப்படும் இடத்தையும் காலத்தையும் ஜேர்மன் குறிப்புகள் பதிவுசெய்கின்றன. வால்நட்சத்திரங்கள், கிரகணங்கள், 1533 பவேரியா (Bavaria) வானில் பறக்கும் உயிரினங்கள் போன்ற காட்சிகளும் உள்ளன. இறுதியான காட்சி வடதுருவ ஒளியைக் குறிக்கலாம் என அறிஞர்கள் கருதுகின்றனர்.
மத அச்சங்களையும் இயற்கை நிகழ்வுகளைக் கவனித்துப் பதிவுசெய்யும் ஆர்வத்தையும் இத்தகைய நூல்கள் பிரதிபலித்ததாக கிறிஸ்டீஸ் நிபுணர் யூஜீனியோ டொனடோனி (Eugenio Donadoni) கூறுகிறார். இயற்கைக்கு அப்பாற்பட்டதாகத் தோன்றும் சில காட்சிகளுக்கு அறிவியல் விளக்கங்கள் உள்ளன. பல சூரியன்கள் போன்ற தோற்றம் பார்ஹீலியன் (parhelion) ஒளி நிகழ்வாக இருக்கலாம்; மழைத்துளிகளுடன் தூசி கலப்பதால் சிவப்பு மழை ஏற்படலாம்.
இந்நூலை உருவாக்கிய துல்லியமான நோக்கம் இன்னும் உறுதியாகத் தெரியவில்லை. காட்சி கற்பனை, வரலாற்றுச் சாட்சி, ஆரம்பகால அவதானிப்பு ஆகியவற்றின் கலவை, கையெழுத்துப் பிரதி நிபுணர்களுக்கு அப்பாலும் ஆர்வத்தை ஏற்படுத்தியுள்ளது. மதிப்பீடு குறைவானதாக இருக்கலாம் என அருங்காட்சியக இயக்குநர் டில்-ஹோல்கர் போர்சர்ட் (Till-Holger Borchert) கருதுகிறார். எனினும், உண்மையான விலை ஏலத்தின் பின்னரே தெரியவரும்.