பொதுமக்கள் எதிர்ப்புக்குப் பின்னர் தீயணைப்பாளர் மாற்றுத் திட்டம் கைவிடப்பட்டது
செல்ட்னம் வெஸ்ட் (Cheltenham West) தீயணைப்பு நிலையத்தின் இரவுநேரப் பணியை நிறுத்தி, சிண்டர்ஃபோர்டில் (Cinderford) பகல்நேரக் குழுவை அமைக்க 14 பணியிடங்களை மாற்றும் முன்மொழிவை குளொஸ்டர்ஷயர் கவுண்டி சபை (Gloucestershire County Council) கைவிட்டுள்ளது. மேலதிகச் செலவின்றி ஃபொரஸ்ட் ஒஃப் டீன் (Forest of Dean) பகுதியில் பதிலளிக்கும் நேரத்தை மேம்படுத்தும் வழியாக இத்திட்டம் முன்வைக்கப்பட்டிருந்தது.
செல்ட்னமின் இரு நிலையங்கள் உட்பட மாவட்டத்தில் ஐந்து நிலையங்கள் 24 மணிநேரமும் பணியாளர்களுடன் இயங்குகின்றன. சிண்டர்ஃபோர்ட் உட்பட மேலும் 16 நிலையங்கள் தொடர்ச்சியான பணிக்குழுவின்றி அழைப்பின்பேரில் செயற்படுகின்றன.
இம்மாற்றத்துக்கு எதிரான தீயணைப்புப் படையினர் தொழிற்சங்க (Fire Brigades Union, FBU) மனுவுக்கு 2,500க்கும் அதிகமானோர் ஆதரவளித்தனர். செல்ட்னம் நாடாளுமன்ற உறுப்பினர் மக்ஸ் வில்கின்சனும் (Max Wilkinson) அவர்களில் ஒருவர். பொதுமக்களின் கருத்துகளை ஆராய்ந்தபோது இம்மாற்றம் பொருத்தமானது எனத் தம்மால் ஏற்க முடியவில்லை என தீயணைப்பு விடயங்களுக்குப் பொறுப்பான உறுப்பினர் போல் ஹொஜ்கின்சன் (Paul Hodgkinson) கூறினார்.
எனினும், முன்மொழிவுக்குக் காரணமான அழுத்தங்கள் மறையாததால் எந்த மாற்றமும் செய்யாமல் இருக்க முடியாது எனச் சபை எச்சரித்துள்ளது. மாற்று ஏற்பாடு எதுவும் திங்கட்கிழமை அறிக்கையில் உறுதிசெய்யப்படவில்லை.
முடிவை வரவேற்ற தொழிற்சங்கம், மக்கள் தொகை வளர்ச்சியும் அதிகரிக்கும் தேவையும் காரணமாக முறையான நிதி அவசியம் எனக் கூறுகிறது. ஒரு சமூகத்திலிருந்து மற்றொன்றுக்கு வளங்களை மாற்றுவது தீர்வல்ல என்பது அதன் நிலைப்பாடாகும். மத்திய அரசிடம் முதலீடு கோருமாறு சபையை வலியுறுத்திய மாவட்டத் தொழிற்சங்கத் தலைவர் கேட் இனெல் (Kate Yhnell), போதிய வளங்களின்றி அதிகரிக்கும் தேவைகளைத் தீயணைப்பாளர்கள் தொடர்ந்து எதிர்கொள்ள முடியாது என்றார்.